митрополиту Одесскому и Херсонскому

Кондак 1

Избранный страстотерпче Христов и премудрый архипастырю, в святости стадо Христово хранивший, священномучениче Анатолие, восхваляя дивное житие твое, смиренно тя умоляем: проси Человеколюбца Господа да помилует нас, ищущих твоего к Нему предстательства и зовущих ти: Радуйся, священномучениче Анатолие, Архиерею Небесному верно служивший.

Икос 1

Ангелом уподобился еси, дивне Анатолие, избранный Господом во святителя еще от младых лет, ибо ты духовную науку постигая, Богу всею душею в иночестем чине послужити возжелал еси. Мы же, воспеваем чистоту жития твоего пениями сими:
Радуйся, во святом крещении Андреем нареченный. Радуйся, яко Андрей Первозванный, ко Господу приведенный. Радуйся, материю в благочестии жить обученный. Радуйся, с Богом навек обрученный. Радуйся, в разуме Богом просвещенный. Радуйся, сердцем в Боге утвержденный. Радуйся, священномучениче Анатолие, Архиерею Небесному верно служивший.

Кондак 2

Видя Господь непорочное житие твое, плотскими страстями не омраченное, сподоби тя, священномучениче Христов, быти достойным монашескаго звания со именем Анатолий. Ты же, с ревностию монашеские обеты исполняя, Господу пел беспрестанно хвалу: Аллилуиа.

Икос 2

Разум Христов чистою душою восприяти сподобивыйся, богомудре Анатолие, неизреченные способности к богословским наукам имел еси и Киевскую духовную академию блестяще закончивши, магистром богословия стал еси. Восхваляя великие научные труды твои, яже во прославление Господа творил еси, воспеваем тебе сице:

Радуйся, измлада смирения и молчания хранителю. Радуйся, заповедей Божиих усердный исполнителю. Радуйся, молитвы и воздержания ревнителю. Радуйся, спастися желающим мудрый учителю. Радуйся, человеческаго суемудрия и неправды обличителю. Радуйся, веры православной неустанный насадителю. Радуйся, священномучениче Анатолие, Архиерею Небесному верно служивший.

Кондак 3

Силою свыше облече тя Дух Святый, пастве Казанстей епископом тя поставляя. Егда же бысть твоя архиерейская хиротония, на тебе, святый Анатолие, сверху сниде свет неизреченный, образуя дивное сияние круг головы твоея. Людие, пораженные сим дивным явлением и видя в нем милость Божию, купно с тобою воспели Творцу: Аллилуиа.

Икос 3

Имеяй в сердце своем свет Христов, святе Анатолие, сошедший на тя в чудесном явлении, ревностно сохранял еси его, совершая святительское служение Господу. Претерпев до конца вся скорби и гонения, кротостию и смирением Христу уподобился еси. Житию твоему подражая, восхваляем тя:
Радуйся, сосуде Божественнаго избрания. Радуйся, цвете благоуханный добраго воспитания. Радуйся, не посрамляющий нашего упования. Радуйся, не уклонивыйся Господа призывания. Радуйся, от нас не отнимающий своего внимания. Радуйся, исполненный райскаго благоухания. Радуйся, священномучениче Анатолие, Архиерею Небесному верно служивший.

Кондак 4

Бурею христоубийства дышуще, богоборческая власть отделила есть Церковь от государства и повелела есть всим духовным заведениям закрытыми быти. Ты же, святителю Анатолие, будучи ректором Казанской духовной академии, умудрился еси ея сохраняти еще некое время, воспевая умудряющему тя Творцу: Аллилуиа.

Икос 4

Слышавше ученицы твоя, яко власть богоборная разрешаху частным образом духовное образования получати, тайно академическое обучение продолжаху, да явно Господь им воздаст за труды и старания я. Ты же, богомудре Анатолие, святейшему патриарху Тихону о достижениях тайной академии рапортовал еси. Восхищаяся таковою мудростию твоею, поем ти:
Радуйся, образе служения нелестнаго. Радуйся, взыскавый Царствия Небеснаго. Радуйся, подателю спасения чудеснаго. Радуйся, врачу недуга телеснаго. Радуйся, избавителю от ада кромешнаго. Радуйся, указателю пути известнаго. Радуйся, священномучениче Анатолие, Архиерею Небесному верно служивший.

Кондак 5

Богу, на судищи Пилатовом стоящему, уподобился еси, блаженне Анатолие, егда власти тя в неподчинении обвиняху и тюремному заключению осуждаху. Ты же, укрепляющему тя Христу, воспевал еси хвалу: Аллилуиа.

Икос 5

Видя в тебе непоколебимую веру и стойкость, боголюбиве Анатолие, по освобождении твоем от уз темничных, благоволи тебе Господь епископом Самарским и Ставропольским быти. Окормляй и нашу паству Херсонскую своим заступлением, поющую ти:

Радуйся, единаго Христа всем сердцем возлюбивый. Радуйся, яко бесценный бисер в душе Его хранивый. Радуйся, дух Пастырю Небесному всецело покоривый. Радуйся, венец из рук Творца на небе получивый. Радуйся, собою образ пастыря достойнаго явивый. Радуйся, яко бесплотный ангел жизнь свою проживый. Радуйся, священномучениче Анатолие, Архиерею Небесному верно служивший.

Кондак 6

Проповедником истины Христовой явился еси, славный священномучениче Анатолие, не терпящие же безбоязненнаго служения твоего, богоборцы снова тя во узы заключаху. Ты же, на Господа все свое упование возложив, сладце воспевал еси Ему во узах: Аллилуиа.

Икос 6

Возсия в сердце твоем свет Божественныя благодати, святителю Анатолие, и вознесе тя на велию высоту, в сан архиепископа возводящую. Мы же, в тебе глубокую веру, высокий дух и несокрушимое мужество зряще, благоговейно поем:
Радуйся, себя на волю Божию всецело предававый. Радуйся, богомыслием уныние неленостно отгнавый. Радуйся, помыслы плотские молитвой проганявый. Радуйся, чадам всепрощение у Господа взыскавый. Радуйся, козни богомерзские присно побеждавый. Радуйся, нетленное наследие в душе своей стяжавый. Радуйся, священномучениче Анатолие, Архиерею Небесному верно служивший.

Кондак 7

Хотяй стадо Христово целым и невредимым к пажитям небесным привести, архипастырю Анатолие, велие попечение о судьбах Церкви имел еси, от раскола ея сохраняя и Христу по вся дни воспевая: Аллилуиа.

Икос 7

Дивное показал еси долготерпение, Христову долготерпению подражаючи, егда в годину тяжких испытаний Одесскую кафедру окормлял еси, будучи ей щитом и оградой. Людие, умиленно на тебя взирая, душами умиротворяхуся и во благом уповании на Бога укрепляхуся. Мы же, духовными очами на тебя взирая, воздаем тебе хвалы сия:

Радуйся, яко путь в Царствие Небесное обрел еси. Радуйся, яко сим путем невозвратно шел еси. Радуйся, яко небесная паче земнаго возлюбил еси. Радуйся, яко Ангелом житием уподобился еси. Радуйся, яко Господа зрети сподобился еси. Радуйся, яко Пресвятей Троице поклонился еси. Радуйся, священномучениче Анатолие, Архиерею Небесному верно служивший.

Кондак 8

Странное и преславное чудо бысть маловерным и малодушным зрети, благодушне Анатолие, како в лютых гонениях священную жизнь стяжевая, утверждал еси слабеющих в вере, укреплял еси немощных духом, призывал еси к терпению в исповедывании веры, поминая слова Спасителя: "Не бойтесь убивающих тело, души же не могущих убить", воспевая с ними: Аллилуиа.

Икос 8

Весь исполнен любви Христовы, благодарно Господу молился еси, егда благоволи Владыка Небесный возвести тя, Владыку земнаго, в сан митрополита, по смирению же своему от поста экзарха Украины уклонился еси. Ты же, паству Одесскую в вере укрепив, по повелению Божию, к Харьковской пастве стопы свои направил еси. Мы же, таковому твоему радению о спасении душ христианских радующеся, воспеваем ти:

Радуйся, страже Церкве Христовы неустрашимый. Радуйся, исполнителю заповедей Его неутомимый. Радуйся, за Господа неверными гонимый. Радуйся, Спасителем на всех путях хранимый. Радуйся, Девою Пречистою с нежностью любимый. Радуйся, Ангелами присно на небесах хвалимый. Радуйся, священномучениче Анатолие, Архиерею Небесному верно служивший.

Кондак 9

Подвигом добрым подвизался еси, всечестне Анатолие, слово Божие в сердца людей вселяя и веру во Христа им умножая. Благодарный же народ Божий много возлюби тя, обреташе бо в тебе сердечное приветствие, глубокое сострадание, отеческое наставление и святительское благословение, Творцу с тобою воспевая: Аллилуиа.

Икос 9

Ветии многовещаннии не возмогут по достоянию восхвалити вся страдания твоя за Христа, страстотерпче Христов Анатолие, не токмо телесныя, но паче душевныя, тяжко бо зрети тебе бысть, яко враги православныя веры лучшия от священства на муки за веру отдаваху и храмы разрушаху: величественный кафедральный Спасо-Преображенский собор, церковь святаго Архистратига Божия Михаила при женской обители бывший, военный Свято-Сергиевский собор и церковь Николая Чудотворца. Мы же, скорби твоя сердечныя ублажая, умиленно поем сице:

Радуйся, яко в райских обителях ныне пребываеши. Радуйся, яко с высоты небесной нас назираеши. Радуйся, яко своим заступлением чудеса содеваеши. Радуйся, яко милость Божию твоими молитвами изливаеши. Радуйся, яко своим предстательством от бед избавляеши. Радуйся, яко плачущих и страждущих с любовию утешаеши. Радуйся, священномучениче Анатолие, Архиерею Небесному верно служивший.

Кондак 10

Спасти хотя души младые от погибели, многия от них ко принятию иерейскаго сана подготовил еси, твердыми быть в вере научая и от Церкви Божией в годины бедствий и гонений не отпадая. Тако в венцах мученических привел еси к Богу многия, жаждущия жизни вечныя, ныне же поющия Богу: Аллилуиа.

Икос 10

Стеною твердою и крепкою оградою Одесской пастве явился еси, святителю Христов Анатолие, богомудрым водительством сохраняя Церковь и словесных овец стада Христова, мужественно боряся с волками. И ныне светом Божественныя твоея мудрости тьма отгоняется, ним же просвещаемии, вопием ти сице:

Радуйся, яко тобою Церковь благоукрасися. Радуйся, яко тобою в ней вера Христова утвердися. Радуйся, яко тобою край наш просветися. Радуйся, яко тобою мир в языцех укрепися. Радуйся, яко тобою душа православная усладися. Радуйся, яко тобою небо умилися. Радуйся, священномучениче Анатолие, Архиерею Небесному верно служивший.

Кондак 11

Пение умиленное приносим ти, священномучениче Анатолие, прославляюще твоя за Христа страдания и молим тя: испроси нам у Господа нашего Иисуса Христа крепко в православии стояти, козней злолукавых избегати и с тобою купно воспевати: Аллилуиа.

Икос 11

Светлым и радостным лицем последовал еси на страдание, уготованное ти от мучителей, страстотерпче Анатолие, в полунощном крае заключение свое отбывая. Воспоминая твои невыносимые страдания, коими ты Господу уподоблялся еси, зовем ти:

Радуйся, таврическаго края славо и украшение. Радуйся, наша защито и ограждение. Радуйся, глухих слышание и слепых прозрение. Радуйся, путей неправедных исправление. Радуйся, веры православной утверждение. Радуйся, сирых и обездоленных защищение. Радуйся, священномучениче Анатолие, Архиерею Небесному верно служивший.

Кондак 12

Благодатию от Бога данною, чрез святое Евангелие, кое в тюремных лагерях сохранити возмолг еси, ты, святе Анатолие, в спокойствии духа и глубокой молитве пребывал еси, во узах веселяся надеждою небесныя свободы, поя Освободителю песнь славы: Аллилуиа.

Икос 12

Поюще твою страдальческую кончину, священномучениче Анатолие, воспоминаем, яко ты держа обеими руками крест нательный свой, иже бысть ти победным знаменем над мучителями твоими, скончал еси шествие твое по жизненному тернистому пути, приняв от Подвигоположника Христа венец мученичества и исповедничества. Мы же, почитая тя выдающимся иерархом Православныя Церкви, зрим в тебе удивительный пример верности Христу Богу и Его святей Церкви и поем ти вдохновенно:

Радуйся, лишенным смысла ум здравый подаваяй. Радуйся, всем с верою приходящим токи чудес изливаяй. Радуйся, в сониих и видениих помощь твою являяй. Радуйся, светом истины нас озаряяй. Радуйся, Божественною любовию души наши согреваяй. Радуйся, страну нашу православную собою украшаяй. Радуйся, священномучениче Анатолие, Архиерею Небесному верно служивший.

Кондак 13

О святый священномучениче Анатолие, дивный архипастырю Божий, к тебе припадаем и заступления твоего смиренно просим: твоею бо благодатною помощию очистим сердца и души наша, да войти возможем в Царствие Божие и Троице Святей воспоем: Аллилуиа. Аллилуиа. Аллилуиа.

(Этот кондак читается трижды, затем икос 1 и кондак 1)

О священномучениче святителю отче Анатолие! К тебе, молитвеннику теплому и пред Богом предстателю усердно притекаем. В лютую годину гонений и испытаний земли нашея, внегда безбожныя врази предаша смерти верныя рабы Божия и храмы святыя сокрушиша, яви тя Господь Церкве Своея аки столп непоколебим и людем Божиим пастыря добра, душу свою за овцы полагающа и волки душепагубныя далече отгоняюща. Ныне убо призри на нас, со умилением душею и сокрушенным сердцем тебе призывающих. Крепость бо наша в нас оскуде и вражия ловления и сети окружиша нас. Молися за нас, да не погибнем до конца со беззаконьми нашими. Но да обратит нас Господь на стезю покаяния и спасения, да простит нам вся согрешения наша и ниспошлет мир на грады и веси наша, избавит нас от нашествия иноплеменников, междуусобныя брани и всяких раздоров и нестроений. Утверди, священномучениче, веру и благочестие во всех чадах Православныя Церкве, испроси нам от Господа мужества дар, да явимся наследницы Царствия Небеснаго, сохраняя верность до конца жизни нашея Господу Богу и Спасу нашему Иисусу Христу. Ему же подобает всякая слава, честь и поклонение, со Отцем и Святым Духом, ныне и присно и во веки веков. Аминь.

Во святителех благочестно пожил еси, и мучения путь скончав, богоборцев ярость посрамил еси, поборник Христову стаду был еси, богомудре. Темже тя почитаем ныне, вопиюще: священномучениче Анатолие, моли Христа Бога спастися душам нашим.

Апостолов сопрестольниче и святителей украшение, православным щит и утверждение был еси, просвещая безбожия нощь глубокую. Сего ради явился еси священнострадалец за Христа. От бед избави нас твоими молитвами, священномучениче Анатолие.

вернутся на главную страницу